মুখ্য পৃষ্ঠা
06/04/25
14:25
আদিম মানৱৰ আৰ্তনাদ
আদিম মানৱৰ ইতিহাস মেলি
মৃত আবাসীৰ ঠিকনা বিচাৰো |
মানৱতাৰ জগতত সুখৰ ৰাজত্ব ,
দানৱে পলে পলে ঘোষনা কৰে
সেয়া দুখৰ ৰাজ্য |
গছৰ বাকলি বোৰ চুই চাওঁ ,
কিজানি লাগি থাকে বুৰঞ্জীৰ তেজ
বুৰঞ্জীৰ তয়াময়া ৰণত ,
বীৰ পুৰুষে বীৰক নিচিনিলে |
তেজৰ ফাকুৱা খেলি
মেৰুদণ্ড বিবেকেৰে ৰাজধানী পাতিলে |
যুগৰ পিচতো যুগ পাৰ হৈ যায়
শতিকা বোৰৰ মানৱতাৰ হিচাপ নাই
অবিৰত ৰাজ্য শাসনৰ ৰণত ,
ধৰাশায়ী কৰে বীৰ পুৰুষে বীৰ পুৰুষক |
দানৱৰ আদিম জীৱন পাঠ পঢ়ি
মগজুৰ পৰা বুকুলৈ
সৰীসৃপ হৈ বাগৰে মানৱতাৰ বেদনা |
ক'ত আছে মানৱতা ?
আদিম ইতিহাসে সোঁৱৰাই ,
দানৱৰ তেজেৰে বুৰঞ্জী লিখি
তোমালোক উলংগ হোৱা ,
তোমালোকে গছৰ বাকলি পিন্ধা
আমাক নকৈ জীয়াব দিয়া |
ইতিহাসৰ পৃষ্ঠাই পৃষ্ঠাই যেন
আদিন মানৱৰ আৰ্তনাদ |
শতিকা যোৰা দুখ বুকুত বান্ধি
প্ৰশ্ন কৰে একবিংশ শতিকাক
তেওঁলোক কিমান পুৰনি ?
কিমান পুৰুষ মৰি মৰি ,
কিমান মৰিশালী হ'ল
কিমান শগুণৰ উদৰ ভৰিল !
© ৰাজু কলিতা
05/12/15
